拍拖唔使排隊買喜茶！ 開人民幣Wechat Pay教學！

同大家一樣，去親深圳玩，而家都會面對兩大難處。第一，買喜茶要排隊，等攞喜茶要排隊，白白無左一個鐘時間玩。第二，無論食飯睇戲買野，無得用電子錢包俾錢而用現金俾，完全係會被人白眼！上個長週末，我地終於決心要去開番個人民幣微信支付Wechat Pay戶口，要令去玩更爽更方便！

首先是注意事項：

1. 即使裝左Wechat有帳戶而且有港元Wechat Pay都好，都不能直接用到人民幣微信支付

2. 用同一個Wechat微信App就可以用到，無分所謂中國版、國際版本App

3. 喺香港無論你試一萬次都好你都開唔到的，信我因為我都試過

4. 要成功開到要準備／做以下幾項

- 搵個平日星期一至五去深圳開戶口，最好係香港假期但中國非假期 (星期六只幫有深圳地址人仕開戶)

- 預備好文件去開戶口 (香港身份證、回鄉卡、護照或車牌或有相工作證、稅單(連T1N號)、3個月內有效地址證明、大陸手機號碼)

- 帶定$1000人民幣去入戶口，$1000以下有機會被收最低存款手續費

準備好之後，深圳開Wechat Pay飲喜茶之旅開始！

1. 過境先買電話卡

我地今次選擇羅湖商業城附近嘅工商銀行開戶口，所以喺羅湖過關。過關後即刻會見到一、兩間小店賣電話卡，分別有中國聯通同中國移動嘅Plan賣。我地買左中國聯通嘅卡，＄200人民幣入面會有$100金額可用，每月月費$6，日計用量$8就有800MB，唔用唔收費。

買電話卡而家都要實名，要出示回鄉卡同影相做紀錄。職員好快會幫你Setup埋，你即刻打到電話，上到網。過程大約15分鐘。Task One Check! (圖係網上搵到的，類似呢種電話卡)

2. 去銀行開戶口

基本上去深圳嘅三間大行，中國銀行、建設銀行同工商銀行都可以為香港人開戶口。我地今次揀咗深圳羅湖商業城工商銀行，除咗因為地點夠方便外，工行嘅自助開戶服務亦好方便。

下午1點左右，前面已經有差不多10個人在排隊準備辦理開戶口手續，全部都係香港人！睇黎大家都好想用Wechat買喜茶 XDDD 問清楚排隊位置後，職員會再次同你確定你帶齊文件，然後幫你影印所需文件。

排到你時，銀行職員會教你輸入資料，影相登記，手機認證等。留意要識得以簡體字寫自己中文名同地址，因為都係用手寫輸入的。過程順利的話只需要10分鐘就完成開戶口，呢部機仲會一次出埋提款卡同網上銀行密碼機俾你。張銀行帳戶卡出黎時，真係令我地好興奮！因為我地足足搞左成3個鐘！

其實開戶口時間唔需要好耐，但因為有唔少人唔識寫簡體字令過程耗時較耐，所以建議上網搵定自己地址點寫。銀行職員亦有禮貌同耐性，慢慢教你同幫你完成整個開戶口手續。

之後係銀行嘅ATM機存款，搵職員幫你開埋網上銀行、手機銀行，咁你個銀行戶口就Ready喇！Task 2 Check!

有齊文件：

- 香港身份證

- 回鄉卡

- 輔助證件包括護照、車牌、有相工作證

- 稅單(提供T1N號 - 係你稅局網上銀行戶口名稱)

- 3個月內有效地址證明

留意：

- 要有大陸手機號碼做認證

- 要識得寫自己中文名同地址嘅簡體字

-  最值存款建議是1000人民幣

工商銀行地址：

深圳市罗湖区建设路火车站广场南侧罗湖商业城1036B

3. 開微信支付Wechat Pay

急不及待我地當然想去開通埋個Wechat Pay。但有Wechat Pay都好，你本來香港個Wechat戶口原生係用緊港元電子錢包，要用人民幣，你要叫一位朋友向你send一個$1人民幣紅包。收到後佢就自動提示你要實名連結銀行帳號，入番哂你個人姓名(簡體)、銀口帳號等等就可以。

成功！！！終於食飯俾錢唔使俾人歧視！

4. 實測！買喜茶！

有左Wechat Pay，買好多野都唔使去排隊俾錢然後再等攞。我地食緊飯時先網上落單，佢即時會顯視俾你睇前面有幾多杯處理緊，食完飯行多個圈，直接去攞喜茶就OK！

5. 以後要充值可以有咩方法？

除左可以有人民幣現金上深圳用ATM機存錢外，你亦可以喺香港透過人民幣找換店過錢去你銀行戶口，再轉去自己微信支付Wechat Pay度。

基本上，有左微信支付Wechat Pay即刻方便左好多，花上半日喺深圳開戶口絕對值得。不過大家要緊記帶齊文件、搵個閒日上去深圳開戶口(除非你有深圳地址)，如果唔係又白行一敞！